web design by mywall
Fieste tal Cuar
Dopo un grum di agns, a Midiusse e àn tornât a fâ la "Fieste tal Cuar". Une fieste furlane fuarte che mi sinti di contâusale in marilenghe. Dut il paîs al è stât invidât a passâ une zornade dongje dai rivâi dal Cuar, intal mieç di un grant prât, platât dai morârs e dai baraçs. I zovins da "Ricreative" di Midiusse (e no dome), ravoiadis su lis maniis e àn fat su une piçule sagre cun tant di griglie a lens, chiosco, musiche e zucs par grancj e piçui. Il timp al veve spaurît ducj, ma instès la int i à crodût e a je lade a fâ fieste. Cussì a misdì di joibe doi di Jugn, da place da glesie e son partîts doi cjars cun int sentade parsore e altre che i lave daûr in biciclete, cjantant e ridint lunc dute la strade fin tal Cuar. Altre int a je rivade par so cont in bici o in machine e po dopo, juste il timp di saludâsi che za e are pronte la paste. Sot dal tendon in plui di cent e cincuante e àn mangjât, bevût e scherçât, e cuant che e àn tacât a fâ i zucs, cui a cjalâ e cui a zuiâ, ducj e àn partecipât in ligrie. Al ere tant timp che no si faseve cheste zornade, tant che la ultime volte cui che al ere un frut o un fantat cumò al è gjenitôr o si è a pene sposât. E cussì, ducj a contâ lis ridadis e lis storiis dismenteadis di vinç agns o jù di li. O crodi che la int che in chê volte e à tacât o puartât indevant cheste tradizion e vedi gust tal viodi che tal doimîl e undis al è ancjemò cualchidun cu la voe di rivivi une zornade dai colôrs e dai profums di une volte. Sigurementri al è ancjemò alc di meti a puest, ma la sodisfazion di chei che àn organizât a je tante di rivâ, la prossime volte, a fâ dut ancjemò plui ben. O disìn grazie a la Ricreative di Midiusse par vê fat dismenteâ a grancj e piçui, almancul par une zornade, la television e i videozucs. Grazie e mandi a ducj.
Ultimi commenti
4 anni 30 settimane fa
7 anni 42 settimane fa
8 anni 32 settimane fa
9 anni 37 settimane fa
10 anni 10 settimane fa
10 anni 17 settimane fa
10 anni 18 settimane fa
11 anni 18 settimane fa
11 anni 19 settimane fa
12 anni 4 giorni fa